Avatangiisinut Upalungaarsimanermulli immikkoortortaqarfimmut immikkoortortami pisortaq
Ulloq atorfiniffissaq: 1. marts 2025 imaluunniit sukumiisumik isumaqatigiissuteqareernerup kingorna.
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik Avatangiisinut Upalungaarsimanermullu immikkoortortami soqutigisalimmik, aaqqiissutissarsinissamut pingaartitsisumut, akisussaassusermik pingaartitsisumik pisortassarsiorpoq.
Atorfik pillugu:
Avatangiisinut Upalungaarsimanermullu iluani naalakkersuinikkut ineriartornikkullu suliassat, suleqatit pisortallu suleqatigiit pikkorissut suleqatigalugit akisussaaffigilissavatit. Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi Naalakkersuisoqarfiup pisortaanut tunngavilersuisuussaatit.
Avatangiiseq piujuartitsinerlu politikkitigut ullormut oqaluuserisassanut pingaaruteqartuuvoq. Avatangiisinut Upalungaarsimanermullu immikkoortortaqarfiup Naalakkersuisunut pilersaarutit pilersaarusianullu annertuunut atuuttussanngortitsinissamut akisussaasuuvoq.
Immikkoortortaqarfiup suliassaqarfiit soorlu, eqqagassalerineq, imeq imerneqarsinnaasoq, sinerissap qanittuani imaani avatangiisit, errortuutikoq, ASN, poortuusersuutit aamma upalungaarsimaneq akisussaaffigai.
Susassaqarfimmi ukkatarineqartuni pitsaaliuineq mingutsitsinermullu akiuiniarneq kiisalu piujuartitsinermi ineriartortitsinermut sinaakkusiinissamut qularnaarinissaq ilaapput. Upalungaarsimanermut susassaqarfiup suliassaqarfiit innuttaasut isumannaatsuunissaannut inuiaqatigiinnilu ajutoornernut ajunaarnersuarnullu suliniuteqarnissamut tunngasut isumagineqarput. Immikkoortortaqarfiup tamatuma saniatigut Upalungaarsimanermut ataatsimiititaliarsuarmut allattoqarfittut atuunnissaq isumagisaraa.
Avatangiisinut Upalungaarsimanermullu suliassaqarfimmi ineriartortitsinermut inerniliussisinnaanissamullu qularnaarinissamut peqataassaatit. Ineriartornermut sammivileeqataallutillu ingerlatitsissaatit.
Atorfik suliassaqarfimmik annertuumik akisussaaffilik pineqarpoq, aamma aqutsisutut soqutigisaqartuunissat, inoqatinik oqaloqatiginnillaqqissuunissat inituujunissallu pingaaruteqarpoq.
Ataqatigiinnermik pilersitsisinnaassaatit tamanna ilutigalugu sammivik paarinissaa artunngilat, naammassisinnaavat kiisalu ulapaarfiusuni tamaat ataatsimut isiginnissinnaanissat attassinnaavat aamma ulluinnaat pissanganartut, suliassat assigiinngitsut apeqqutaagajupput soorlu saaffiginninnerit politikkikkut tunngassuteqarsinnaasut, innuttaasuninngaanneersinnaasut imaluunniit kommuneqarfinninngaanneersinnaasut. Ulapaarfiusuni unnukkut weekendinilu sulinissaq naatsoruutigineqarsinnaavoq.
Piginnaasatit pikkoriffitillu
Ingerlaqqiffiusumik ilinniagaqarsimavutit aammalu pisortani imaluunniit namminersortuni suliffeqarfimmi atorfeqarnermit ukiut arlallit allaffissornikkut misilittagaqarlutit. Attaveqaqatigiinneq aamma pitsaassutsinik isumannaarineq suliassanni pingaaruteqartunut ilaammat, oqaaseqatigiiliullaqqissuunissat pingaaruteqarpoq, pingaartumik allattariarsornermi.
Piginnaasatit pikkoriffitillu
- Ingerlaqqiffiusumik ilinniagaqarsimaneq aammalu pisortani imaluunniit namminersortuni suliffeqarfimmi atorfeqarnermit ukiut arlallit allaffissornikkut misilittagaqarluarneq. Pisortatut milittagaqarneq aamma pisortatut piginnaasaqarneq.
- Avatangiisinut, suleqateqarnissamut sunniuteqarluarnissamullu paasisimasaqarluarneq.
- Kalaallit Nunaanni avatangiisinut upalungaarsimanermullu sulianut paasisimasaqarneq.
- Ulluinnarni ulapaarfiusuni ullormut oqaluuserisassanut suliassanullu allanngorartunut tulleriaarisinnaanissaq.
- Pilersaarusiornermut piginnaaneqarneq aamma tamaat ataatsimut isiginnissinnaassuseqarneq, kiisalu anguniagaq anguniarlugu allanut ikiuinissannut piginnaaneqarneq.
- Suliniutinut ataavartunut malinnaasinnaaneq aamma peqatigiiffiit avataanilu suleqatit akornanni suleqateqarnissamik qularnaarineq.
- Immikkoortortaqarfimmi atorfimmut pikkorissusermik aamma pitsaassusermik inerniliinissaq.
- Allattariarsornikkut oqaluttuariarsornikkullu paasinartumik erseqqissumik attaveqaqatiginnissinnaanissaq.
- Aqutsisutut akisussaassuseqarneq kajumissuseqartitsinerlu.
- Suleqatit atugarissaarnissaannut peqataasarneq aamma tunniusimaneq
- Naalakkersuisoqarfimmi allangorartuunngitsoq sivisuumillu tunniusimasoq.
Kalaallit Nunaanni pissutinik ilisimasaqarneq kiisalu kalaallisut, danskisut tuluttullu oqalusinnaaguit iluaqutaassaaq.
Nunalerinermut, Imminut Pilersornermut, Nukissiutinut Avatangiisunullu Naalakkersuisoqarfik pillugu
Naalakkersuisoqarfimmi sulisut 45-rut missaanniippugut, tassanilu Avatangiisinut Upalungaasimanermullu 12-inik sulisoqarluni, taakkunanilu amerlanerit avatangiisinut suliassaqarfiup iluani suliaqartuullutik. Tamatuma saniatigut pisortat pilersuinermut suliffeqarfiutaat Nukissiorfiit, Innaallagissiornermut Oqartussat, Pinngortitaleriffik aamma Asiaq naalakkersuisoqarfiup ataani inissisimapput.
Naalakkersuisoqarfimmi inuiaqatigiinni suliassat pingaaruteqartut suliarisarpagut Kalaallit Nunaannut iluaqutaasussat. Suliffik pitsaasoq pingaartipparput aamma inuttut sulianut inerniliussanut sunniuteqarnissaat inissaqartillugu. Ineriartornermut suliassat soqutiginartut suliassarisarpagut, aamma uagutsinnut illit suliffimmi ineriartorsinnaasutut misiginissat pingaaruteqarpoq. Naalakkersuisoqarfimmi aqutsisut nukittorsaanissaq pingaartippaat aamma atugarissaarnissaq aalajangiusimalluinnarlugu. Naalakkersuisoqarfimmi ingerlarsortuuvugut ingerlarsortuuvugut aamma akisussaaffeqartut. Naalakkersuisoqarfimmi ataatsimut ataasiuvugut, tassanilu allaanerussuserput nakuussutigalugu. Taamaammat uani avatangiisimi imminut ineriartoqataanissat aamma tapersiisinnaanissat takusinnaassavat.
Neqeroorutigaarput:
- Akisussaaffik annertooq aamma naleqquttumik akuersaartumik allannguuteqarfiusinnaasoq
- Pisortatut atorfik soqutiginartoq aamma aqutsisutut ineriartornissamut periarfissaqarluarfiusoq
- Aqutsisut ingerlalluartut qanimut suleqatigiinnissamut pingaartitsisut tatiginartullu
- Suliffik pilerinartoq persuarsiortorpalaanngitsoq aamma ataqqinniffiusoq tatiginartorlu
- Suliassaqarfik soqutiginartoq tamatigoortoq annertuumiillu inuiaqatigiinnut aamma nunarsuarmut tamarmut ukkatarinniffiusoq
Aningaasarsianut atorfininnermilu atugassarititaasut
Atorfik akissaateqarfimmi LR 38-mi maanna inissisimavoq.
Apriilip aallaqqaataani 2022-mi LR 38-mi akissarsiat isumaqatigiissutigineqartut tapit aalajangersimasut ilanngullugit qaammammut 59.906 koruuniupput ukiumoortumillu 718.873 koruuniullutik. Pisortat pillugit isumaqatigiissut nutaaq isumaqatigiinniutigineqarpoq qanittumilu naammassineqartussatut naatsorsuutigineqarluni.
Aallaaviatigut isumaqatigiissutini atugassarititaasut naapertorlugit atorfinitsitsisoqassaaq, qinnuteqartorlu tjenestemanditut atorfeqareersimaguni Nunatsinni pisortani tjenestemandit pillugit inatsit malillugu tjenestemanditut atugassarititaasut naapertorlugit atorfinitsitaasoqarsinnaavoq.
Atorfimmut atuuttoq tassaavoq, piffissap suliffiusussap qanoq sivisutiginissaa killilersugaanngimmat, aammalu qaangiuttoornermi ajunngitsorsiassat akilerneqarnissaat ullullu sulinngiffissat annaaneqartut ajunngitsorsiassarsissutiginissaat atorneqarsinnaanngillat. Piffissaq suliffiusussaq tunngaviatigut sapaatit akunnerannut nalunaaquttap akunnerinik 40-nik sivisussuseqarpoq.
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Misilitsinnermik ingerlatsisoqarnissaa qinnuteqartut piareersimaffigissavaat.
Sillimaniarnermut akuerisaaneq
Atorfininnissaq eqqarsaatigalugu sillimaniarnermut akuerisaasinnaanerit ‘Isertuussassaq’-mut piumasaqaataavoq, tamanna atorfeqarnerup tamaat atuutsinneqarsinnaavoq.
Ineqarneq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunip inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il. apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumilluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq.
Annertunerusumik paasisaqarusuppit?
Atorfik pillugu paasissutissat annertunerusut Naalakkersuisoqarfiup pisortaaneranut Natuk Lund Meire-imut, oqarasuaat +299 34 64 76, e-mail: natl@nanoq.gl saaffiginninnikkut pissarsiarineqarsinnaapput.
Qinnuteqaatinut piffissamut killiliussaq
Qinnuteqaat, CV aamma soraarummeersimanermut uppernarsaatit assilineri ilanngullugit, link matuma kingulianiittoq aqqutigalugu kingusinnerpaamik ulloq 28. Januar 2025 nassiunneqassaaq. E-mail-ikkut qinnuteqaatinik tigusineq ajorpugut.
Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.
Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.
Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job