Allagarsiuteqqitaq - Digitalinngortitsinermut Aqutsisoqarfimmi pisortaq

Aqutsineq piginnaasaqarluarfigiviuk Kalaallit Nunaannilu nuna tamakkerlugu digitalinngortitsinermik suliaqarneq siuttuuffigerusullugu? Taava immaqa illit Digitalinngortitsinermut Aqutsisoqarfiup pisortartaassarivaatit!

Digitalinngortitsinermut Aqutsisoqarfik inuiaqatigiinnut kalaallinut aaqqiissutissanik digitaliusunik isumannaatsunik assigiissaakkanillu pilersuisuuvoq. Nuna tamakkerlugu nittartakkatigut paasissutissatigullu sillimaniarneq, nunalu tamakkerlugu digitalimik ineriartortitsineq aqutsisoqarfiup akisussaaffigai, aammalu aqutsisoqarfiup oqartussaasutut suliassaqarfigisaani digitalimik ineriartortitsinermut nunalu tamakkerlugu malittassanut sinaakkusersuisuulluni, tamatumunnga ilanngullugit nuna tamakkerlugu aaqqiissutinik digitaliusunik ingerlatsineq aamma sullissinissamut anguniakkanik erseqqissunik aalajangersaaneq, pilersuinerup isumannaatsuunissaa, aningaasaqarnermik aqutsineq periusissiatigullu ineriartortitsineq.

Aqutsisoqarfimmi pisortatut periusissiat maanna atuuttut iluatsilluartumik naammassineqarnissaat qulakkeerinneqataaffigissavat.

Aqutsisoqarfiup qitiusumik allaffeqarfimmi immikkoortortat tamaasa pilersugaralugillu suleqatigai, aammalu avataani suleqatigisartagaqarpoq, pilersuisoqarpoq soqutigisaqaqateqarlunilu assigiinngitsorpassuarnik. Taamaattumik soqutigisaqartut siammasissut tapersersuinissaat qulakkeerniarlugu periusissiat tunngavigalugit sulisinnaasariaqarputit, attaveqaqatigiinnermut piginnaasaqarluarlutit kiisalu sulisunik suliatigut immikkut ilisimasalinnik aqutsisinnaasariaqarlutit aqutsisoqarfiullu tamarmiusup pisortaaffiginissaa piginnaasaqarfigalugu.

Aqutsisoqarfik nuna tamakkerlugu digitalimik aaqqiissutinik arlalinnik ingerlatsisuuvoq qitiusumillu allaffeqarfimmi IT-mik ingerlatsinermik inatsisinillu malitsitsinermik isumaginnittuulluni – ingerlatsinermi suliassaqarfiit pingaarutillit annertuut - ingerlatsinerup immikkoortuisa ilai qitiusumik allaffeqarfimmut inuiaqatigiillu ataatsimut isigalugit pingaaruteqarluinnartutut inissisimapput. Taamaattumik pingaaruteqarpoq aqutsisoqarfimmi pisortatut ajornartoorfiusunik tassanngaannartumik pisunik isumaginnissinnaanissat, tamatumunngalu peqatigitillugu suleqatiginneriaatsimik pitsaasumik attataqarsinnaassaatit ineriartortitsisinnaallutillu aammalu aqutsisoqarfiup anguniagaanik periusissiaanillu sullinniakkanut assigiinngitsunut ingerlatitseqqiisinnaassallutit. Taamaattumik aqutsinermik misilittagaqarluarputit, pisullu taama ittut isumaliutigilluakkamik anersaaqarluni tamatigut isumagineqartassapput aamma suliarinninnermut aarlerinaatit tunngavigalugit aqutsinermik tunngaveqassallutik.

Aqutsilluarnissaq pingaartinneqarpoq, taamaattumillu ukiuni arlalinni aqutsinermik misilittagaqarneq aqutsinikkullu piginnaasaqarluarneq pisariaqarluinnarput. Aqutsisuussaatit misilittagartooq - aamma pisortaasut aqunneqarnerinut, aammalu aqutsinermi suliatigut piginnaasaqarluarneq pingaartissavat aqutsisoqarfiullu akisussaaffeqarfigisaani tallimaasuni qaffasissutsini tamani isumassarsiortitsisinnaaneq, kajumilersitsisinnaaneq ineriartortitsisinnaanerlu paasisimasaqarfigalugit:

Sulisunik aqutsisoqarfik – aqutsisoqarfiup aningaasaqarnermik aqutsineranik inatsisitigullu akisussaaffeqarfittut suliassaqarfiinik isumaginnittuuvoq. Inatsisinut immikkoortortaq IT-mut tunngasunik pisiortornermut, paasissutissanik illersuinissamut aamma inatsisiliornerup digitalinngortitsinermut piareersimanissaa pillugu pisortani oqartussaasunut tamanut siunnersuisarpoq ikorfartuillunilu. Inatsisitigut ingerlatsinermi suliassat ilaatigut tassaapput aqutsisoqarfiup inatsisiliornermut suliniutinik pilersaarutaata naammassineqarnissaa, isumaqatigiissutinik suliarinninneq, suliariumannittussarsiuussinermut pilersaarut aamma nakkutilliinermut aaqqissuussineq.

Digitalimik Sullissivik – oqartussat ataatsimoorussamik innuttaasunut suliffeqarfiutilinnullu nittartagaata sullissivik.gl-ip aamma naalakkersuisut nittartagaata naalakkersuisut.gl-ip teknikkikkut ingerlanneqarnerannik ineriartortinneqarnerannillu isumaginnittuuvoq. Tamatuma saniatigut immikkoortortaqarfiup pisortat ataatsimoorussamik nittartakkatigut aaqqiissutissaannik qitiusumik allaffeqarfiup paasissutissanut nittartagaannik 27-nik imaqartumik ingerlatsinermik ineriartortitsinermillu suliaqarpoq.

Suliniutinut immikkoortortaqarfik – pingaarnerusutigut marlunnut avinneqarsimasumik akisussaaffeqarpoq: 1. PMO – nuna tamakkerlugu digitalinngortitsinermut periusissiami suliniutinik aqutsineq aamma suliniutinut digitalinngortitsinermut periusissiamut kontumit aningaasaliiffigineqartut kiisalu pisortat ataatsimoorussamik suliniutinut ilusiliaannik ineriartortitsineq ingerlatitseqqiinerlu 2. Suliniutinik aqutsineq – immikkoortortaqarfimmi aqutsisut periusissiamit suliniutinik immikkut toqqakkanik aqutsisuupput.

IT-mut immikkoortortaqarfik – IT-p kiffartuussivianik isumaginnittuuvoq, applikationinik ingerlatsineq aamma ESDH-systemimik ineriartortitsineq, qitiusumik allaffeqarfiup ataatsimoorussamik serveriinik attaveqaataanillu IT-kkut ingerlatsineq ineriartortitsinerlu, kiisalu pisiortorfigisartakkanik aqutsinermut akisussaaffik 60-init amerlanerusunik isumaqatigiissuteqarfiusoq akuersissuteqarfiusorlu. Immikkoortortaqarfimmi immikkut ukkarineqartoq tassaavoq IT-kkut isumannaallisaaneq attaveqaqatigiinnerlu isumannaatsoq, ingerlatsineq ineriartortitsinerlu ukkataralugit.

Nittartakkatigut paasissutissatigullu sillimaniarnermut immikkoortortaqarfik – nuna tamakkerlugu nittartakkatigut paasissutissatigullu sillimaniarnermi suliniutinut pingaarnertut ukkataqartuuvoq, tamatumunnga ilanngullugit nittartakkatigut paasissutissatigullu sillimaniarneq pillugu innuttaasunut, suliffeqarfinnut oqartussanullu siunnersuineq paasissutissiinerlu. Qitiusumik allaffeqarfiup suliffeqarfiup iluani paasissutissatigut sillimaniarnera immikkoortortaqarfimmit aamma isumagineqarpoq, immikkoortortat paasissutissatigut sillimaniarnermik suliaqartut tamaasa siunnersugaralugillu nakkutigisaralugit.

Aqutsisoqarfik akimorlugu suliat maannakkut ingerlanneqartut

Immikkoortortaqarfiit ineriartortitsinermik maannakkut suliniutigisaasa ilaat tassaapput:

• Sulisunik aqutsisoqarfik: aqutsisoqarfimmi ingerlatsiveqarnikkut suliaqarfimmik inerisaaneq, ukiunut missingersuusiorfiusunut inatsisinut pilersaarummik akuersissuteqartarneq nakkutilliinermullu aaqqissuussinermik atulersitsineq
• Digitalimik Sullissivik: pisortat nittartagaannut 27-usunut nittartagaqarnermut aaqqissuussinerup ineriartorteqqinneqarnera, sullissivik.gl-imut UX-imik misissueqqissaarneq najoqqutassiarlu aamma sullissivik.gl-imi Uanga Quppernera-mik ineriartortitsineq.
• Suliniutinut immikkoortortaqarfik: immikkoortortaqarfimmi PMO – suliniutinik aqutsinerup inerisarneqarnera pisortallu ataatsimoorussamik suliniutinut ilusiliaannik tassungalu atasumik ilinniartitsinermut aaqqissuussinermik ineriartortitseqqinneq. Immikkoortortaqarfimmi suliniutinut aqutsisut maannakkorpiaq Pisortat Digitalinngortitsinermi Ataatsimoortumik Iluseqartitsinissaannik ineriartortitsinermik suliaqartinneqarput, sullissivik.gl-imut Uanga Quppernera-mik ineriartortitsineq, backlogimilu digitalikkut peqataatitsinissamut suliniummut nassuiaasersuisoqarluni, paasissutissanut periusissiortoqarluni aammalu Kalaallit Nunaanni paasissutissatigut periarfissanik ataatsimut isiginninnissamik suliaqartoqarluni. Suliniutit ingerlasut allat aamma tassaapput: paasissutissanut tunngaviusunut aaqqissuussineq aamma ingerlatsinermik ilusilersuineq. Suliniutit taakku tamarmik aqutsisoqarfimmit siunissami ingerlanneqartussaapput.
• IT-mut immikkoortortaqarfik: IT-mik ingerlatsinermut immikkoortunut aningaasartuutinik erseqqissaaneq inatsisinillu malitsitsineq, qitiusumik allaffeqarfimmi aaqqissuussinerit qitiusut marluk ukiaru suliariumannittussarsiuunneqarnissaat, suliniummi ‘Qitiusumik allaffeqarfimmi ISO-mik atulersitsineq’-mi teknikkikkut malitassat suliatigut akisussaaffigineri.
• Nittartakkatigut paasissutissatigullu sillimaniarnermut immikkoortortaqarfik: ISO 27001-ip atulersinneqarnissaata akissussaaffiginera, paasissutissatigut sillimaniarneq pillugu aqutsisunut ilinniartitsinikkut aaqqissuussineq aamma innuttaasunut, suliffeqarfinnut oqartussaasunullu paasititsiniaanermut toqqammavissamik inerisaaneq.

Naatsorsuutigaarput:

Piginnaasat

• Ilinniagartuutut naleqquttumik ilinniagaqarneq
• Ukiuni arlalinni aqutsisutut misilittagaqarneq aqutsinermullu tunngatillugu piginnaasaqarluarneq aammalu aqutsisoqarfimmut tamarmut atuuttumik suleqatigiinnik isumassarsiortitsisinnaasoq, kajumilersitsisinnaasoq ineriartortitsisinnaasorlu
• Pisortani aaqqissuussaanerit kulturiisalu paasisimasaqarfiginerat
• Pilersaarusiukkamik piffissarlu ungasinnerusoq eqqarsaatigalugu suleriaaseqarneq, nutaaliorneq teknikkikkullu periarfissat ukkatarilluarlugit
• Attaveqarniarnikkut piginnaasaqarluarneq, allattariarsornikkut oqaluttariarsornikkullu, oqariartuutinik pisariusunik erseqqissumik paasiuminartumillu ingerlatitseqqiisinnaaneq
• Suliffiup iluani avataanilu soqutigisaqaqatinut attaveqarnernik nukittuunik pilersitsisinnaasoq malinnaatitsisinnaasorlu
• Angusanik tunniussaqarsinnaanermik uppernarsaateqarneq suliniutinillu iluatsilluartumik ingerlatsisinnaaneq sulianillu pitsaasumik ingerlatsisinnaasoq
• Digitalinngortitsineq, IT aamma suliniutinik aqutsineq pillugit ilisimasaqarluarneq
• Pinerluuteqarsimannginnermut uppernarsaammik takutitsisinnaaneq
• Atorfininnerup kingorna isumannaallisaanikkut akuerineqassaatit

Inuttut piginnaasat

• Aaqqissuulluakkamik suleriaaseqarneq tunniussaqartarnikkullu tatiginartoq
• Nutaaliorusussuseqartoq, isumassarsiullaqqissoq nutaamillu eqqarsarluni ajornartorsiutinut aaqqiissutissarsiorsinnaasoq digitalimillu aaqqiissutinik nutaanik ineriartortitsisinnaasoq
• Tatisimaneqarluni pisunilu pisariusuni aalajangiisinnaassuseqarluarneq
• Inuttut innarligassaanngitsoq sulinermilu tamanut atuuttumik ileqqorissaarnissamik pingaartitsisoq
• Paasinnittoq sulisullu pisariaqartitaannut isumakuluutigisaannullu tunngatillugu paasinnillunilu iliuuseqarsinnaasoq
• Uppernartoq, akisussaassusilik, unneqqarissoq, tatiginartoq ataqqinnittorlu

Digitalinngortitsinermut Aqutsisoqarfiup neqeroorutigai

• Atorfik soqutiginartoq, inuiaqatigiit kalaallit digitalimik ineriartortinneqarnerat toqqaannartumik sunniuteqarfigalugu
• Suliffeqarfik allanngorartoq isumassarsiorfiusinnaasorlu tunniusimasunik suliatigullu pikkorissuseqarluartunik sulisoqartoq
• Sulinermi avatangiisit atugarissaarnissamik qaffasissumik ataavartumik suliniuteqarfiusut – immikkoortortaqarfinni aqutsisoqarfillu ataatsimut isigalugu
• Pisortani digitalinngortitsinissamik suliaqarnermi siunissap ilusilersorneqarneranut aqutsisoqarfimmi pisortatut qitiusumik inissisimaneq
• Suliaqarfik ineriartortuarfiusoq
• Atorfik annertuumik akisussaaffeqartitsisoq amerlasuunullu attaveqarfiusoq

Akissarsiat – atorfeqartitaanermilu atugassarititaasut

Ukiunut sisamanut killilikkamik atorfeqartitaanermut allamilu atorfininnissamut qulakkeerinniffiunngitsumut akissarsiat, LR 39-mi 1. apriili 2022-mit ukiuni killilinni atorfeqartitaanermut tapit aamma akissarsianut tapit aalajangersimasut qaammammut kr. 83.631-upput soraarnerussutisianut akiliutit ilanngullugit. 

Tamatumunnga ilanngunneqassaaq ukiumoortumik sulinngiffeqarnermi ajunngitsorsiassanik katersineq, ukiumoortumik sulinngiffeqarnermi angalanermut tapiissutit kiisalu ukiuni killilinni atorfeqartitaanerup nalinginnaasumik atorunnaarnerani atorfeqarunnaarnermi aningaasat ukiuni killilinni atorfeqarnermi ukiut atorfeqarfigisat amerlaqataannik qaammammusiat amerlaqataat.

Akissarsiat "Pisortanut Ataatsimut Isumaqatigiissut” 20. oktobari 2020-meersoq malippaat.

1. apriili 2022

Akissarsiat tunngaviusut 34.654,69 

Soraarnerussutisianut akiliutit 36.522,41 

Ukiuni killilinni atorfeqartitaanermut tapit 12.454,00 

Katillugit 83.631,10

Aallaaviatigut isumaqatigiissutini atugassarititaasut naapertorlugit atorfinitsitsisoqassaaq, ukiunullu aalajangersimasunut killilerlugu inuttalerneqarsinnaalluni. Qinnuteqartorlu tjenestemanditut atorfeqareersimaguni Kalaallit Nunaanni pisortani tjenestemandit pillugit inatsit malillugu tjenestemanditut atugassarititaasut naapertorlugit atorfinitsitaasoqarsinnaavoq.

Naalagaaffimmi tjenestemandit aamma AC-nut isumaqatigiissutit arlallit, ilaatigut DJØF-ip Finansministereqarfiullu akornanni isumaqatigiissutit malillugit sulisut Namminersorlutik Oqartussani atorfinitsinneqarnerminnut atatillugu aningaasarsiaqaratik sulinngiffeqarsinnaatitaapput. Aammattaaq Nunamut namminermut Ministereqarfiup Namminersorlutik Oqartussani atorfinitsitaanerminnut atatillugu akissarsiaqaratik sulinngiffeqarallarnissamik qinnuteqaateqartunut akuersaartumik pissusilersortoqassasoq Namminersorlutik Oqartussanut innersuussutigisimavaa. Sulinngiffeqarallarnissaq pillugu aalajangersakkat Namminersorlutik Oqartussani inuit atorfinitsinneqartut aapparisaannut/inooqataannut aamma atuupput.

Atorfimmut atuuttoq tassaavoq, piffissap suliffiusussap qanoq sivisutiginissaa killilersugaanngimmat, aammalu qaangiuttoornermi ajunngitsorsiassat akilerneqarnissaat ullullu sulinngiffissat annaaneqartut ajunngitsorsiassarsissutiginissaat atorneqarsinnaanngillat. Piffissaq suliffiusussaq tunngaviatigut sapaatit akunnerannut nalunaaquttap akunnerinik 40-nik sivisussuseqarpoq.

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Namminersorlutik Oqartussat kattuffiullu isumaqatiginninniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Ineqarneq

Atorfimmut atatillugu inissaqartitsisoqanngilaq. Qinnuteqartoq Namminersorlutik Oqartussani atorfeqarnerminut atatillugu ineqarsimappat, inissamik innersuunneqarsinnaatitaaneq pigiinnarneqassaaq. Atorfeqarnermut atatillugu ineqartitaaneq atorfeqarnerup nalaani atuuppoq soraarnermilu tamanna atorunnaassaaq.

Qinnuteqarfissap killinga

Oktobarip 16-iani 2024

Soqutiginartippiuk?

Atorfik pillugu apeqqutissaqaruit Flies HR-imeersup Partner Dorthe Fliesip oqarasuaatikkut +299 583117-imut, +4560833117-imut imaluunniit e-mailikkut dorthe@flieshr.dk-mut attaveqarfiginissaanut tikilluaqqusaavutit

Flies HR sulisussarsiornermik isumaginnittuuvoq, taamaammat saaffiginnissutit tamaasa tassunga ingerlateqquneqarput. Qinnuteqartunik piukkunnartunik oqaloqatiginninnissamut ingerlaavartumik aggersaasassaagut.

Atorfik pillugu allanik apeqqutissaqaruit Naalakkersuisut siulittaasuata Naalakkersuisoqarfiani Naalakkersuisoqarfimmi pisortaq Hans-Peder Barlach Christensen Hape@nanoq.gl-imut allaffigalugu saaffiginninnissamut tikilluaqqusaavutit.

Tusarfiginissat qilanaaraarput.

Kikkuuvugut

Namminersorlutik Oqartussat pillugit paasissutissat amerlanerusut www.naalakkersuisut.gl-imi nassaarineqarsinnaapput. 

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk