Aalborgimi Kalaallit Illuat pisortassarsiorpoq

Aalborgimi Kalaallit Illuat, Aalborgip illoqarfiata qeqqani suliffeqarfimmi pissanganartumi siuttuulluarsinnaasumik pisortassarsiorpoq. Aalborgimi Kalaallit Illuat suliffeqarfiuvoq namminerisamik ingerlanneqartoq, 13-inik sulisulik namminerlu siulersuisoqartoq.

Ukuninnga piginnaasaqartumik ujartuivugut:

Suliffiup avatangiisiinik pitsaasumik aammalu assigiinngitsunik atorfeqartunut isumassaqartitsisinnaasumik qulakkeerinnissinnaasumik, matumani suliassanut naammassinnilluarsinnaaneq, pitsaassuseq nutaanik isumaliorsinnaaneq qitiutinneqassallutik 

• Suliassat naammassisassat siulersuisunit aalajangersarneqarsimasunut tunngatillugit, periusissat pingaarnertullu malittarisassat naapertuuttuujuarnissaannut qulakkeerisarnissaq 

• Aalborgimi Kalaallit Illuanut periusissianik takorluukkanillu ingerlaavartumik ineriartortoqarnissaanik tapertaasarnissaq 

• Aqutsisinnaasoq sulisunillu qanimut suleqateqarsinnaasoq kiisalu siunersueqatigissallugu piukkunnaatilik 

• Periusissiat akuersissutigineqarsimasut piviusunngortissinnaanissaannut isumalluutit pisariaqartinneqartut ingerlaavartumik qulakkeerinnittarnissaq 

• Ministeriaqarfinnit, aqutsisoqarfinnit aammalu aningaasaateqarfinnit assigiinngitsunit qinnuteqarnissamut periarfissanut tunngatillugu paasisimasaqarluartuuneq 

• Danmarkimi aammalu Kalaallit Nunaanni oqartussanik qanimut suleqatigiinnerni siuttuuneq

Naatsorsuutigaarpullu illit uku piginnaasaqarfigissagitit:

• Kalaallit kulturianut, oqaasiinut aammalu inuiaqatigiinni pissusiinut ilisimasaqarluarneq 

• Tatiginarluinnartumik nutaanik suliaqarluarnissamik piumassuseqarluartuusutit 

• Aqutsinermik atorfeqartareernikkut aammalu aqutsisutut ilinniareersimanikkut piginnaasaqarluarneq 

• Aalborgimi Kalaallit Illuat sinnerlugu angusaqarluarniartuunissaq 

• Inuk tunniusimasoq inooqataanikkut naapertuilluarnermik aammalu inunnik ikiuiniarnermik suliaqartartoq 

• Inuk Danmarkimi aammalu Kalaallit Nunaanni inuiaqatigiit ineriartornerinik ilisimasalik paasisimasaqarluartorlu – taakkununnga ilanngullugu Kalaallit Nunaanni ilinniarsimassutsip qaffassarnissaata pingaaruteqassusaanik paasisimasaqarluartoq

Atugassarititat:

Akissarsiassat atorfinitsinneqarnermilu atugassarititassat immikkut isumaqatigiissusiornikkut pissapput. Atorfik piaartumik inuttalerneqarnissaa kissaatiginarpoq, inulli eqqortoq utaqqisinnaavarput.

Atorfimmut annertunerusumik apeqqutissaqartoqassappat uunga saaffiginnittoqarsinnaavoq: Pisortaagallartoq Jørgen Hein, oqarasuaat: 2516 2990.

Qinnuteqarnissamut killigititaq: 6. januaari 2025. Sapaatit akunnerini 3-mi aammalu 4-mi piukkussanut oqaloqatiginninnerit ingerlanneqarnissaat naatsorsuutigineqarpoq.

Qinnuteqaat qallunaatoortoq, CV, oqaaseqaatit atortullu allat attuumassuteqartut uunga nassiunneqassapput jh@dgh-aalborg.dk

Aalborgimi Kalaallit Illuat pillugu:

Immikkoortut pingasut iluini suliaqarpugut, suliagullu tassaapput ilinniarnermik ilitsersuineq, inooqataanikkut suliaqarneq kiisalu kulturikkut attaveqaqatigiinnikkullu suliaqarneq. Immikkoortut tamarmik annertupput pissanganartuullutillu ineriartortinneqartuaannartuullutillu. Suleqatigiit suliassaqarfiit iluinni misilittagartuujupput malitsigisaanillu Aalborgimi Kalaallit Illuat Jyllandip avannaani qitiusumik suliaqartarpoq.

Aalborgimi Kalaallit Illuat Danmarkimi Kalaallit Illui pingasut allat qanimut suleqatigilluartarpai – Danmarkimi Kalaallit Illui nittarsaalluarneqartarput – aammalu Aalborgimi Kalaallit Illuani pisortatut suleqatigiilluarnerup ingerlatiinnarneqarnissaanik akisussaaffik tigummineqassaaq.

Nittartagatsinni annerusumik atuagaqarsinnaavutit, nittartagarput aana: www.dgh-aalborg.dk